Liñas de investigación do EVEGA

O obxectivo da Estación é optimizar a produción vitivinícola través da investigación e da experimentación. As liñas que se seguen son:

Viticultura

Constitución dun banco de xermoplasma, con recollida, conservación e estudo de variedades de cultivo ancestral en perigo de extinción.
Selección clonal e sanitaria de variedades de vide autóctonas, en particular das recoñecidas como preferentes nos regulamentos das distintas denominacións de orixe.
Determinación das técnicas óptimas de cultivo do viñedo, con especial atención á xeometría das plantacións (densidade e marco de plantación, sistemas de condución e poda) nas distintas zonas de cultivo.
Determinación das técnicas idóneas de mantemento do solo no viñedo.
Establecemento de sistemas óptimos de defensa fitosanitaria do viñedo, priorizando os mecanismos de loita integrada.

Enoloxía

Caracterización dos viños producidos nas distintas denominacións de orixe galegas mediante parámetros físico-químicos que poidan aportar elementos diferenciadores (compoñentes aromáticos, contidos en elementos metálicos ou parámetros de cor, entre outros)
Determinación das técnicas idóneas de vinificación das variedades de vide galegas con atención á problemática específica das distintas denominacións de orixe.
Fixación das condicións óptimas de conservación dos viños galegos nos ensaios de consumo mediante o estudo da evolución a curto, medio e longo prazo dos seus compoñentes físicos e químicos.
Estudo das técnicas de destilación das augardentes de bagazo galego e tipificación entre os posibles competidores no ámbito europeo.

Laboratorio de análise

Análises dos viños producidos nas distintas denominacións de orixe. Determínanse os parámetros de acordo coas metodoloxías C.E.E., Regulamento 2676/90 da Comisión Europea, no que se regulan os métodos de análise comunitarios que se poden aplicar no sector.
Investigación mediante parámetros físico-químicos e biolóxicos que poidan aportar elementos diferenciadores (compoñentes aromáticos, contidos en elementos metálicos ou parámetros de cor, entre outros).