Información a recoller e índices a elaborar polo Observatorio do Sector Lácteo de Galicia
- Introdución
A definición dos aspectos da cadea de produción, transformación e distribución de produtos lácteos que son obxecto de estudo por parte do Observatorio faise contando coas orientacións formuladas polos axentes representados na Mesa do Leite. O observatorio elabora regularmente información sobre os seguintes aspectos:
- A estrutura de custos das explotacións lácteas e a súa evolución
- Prezos
- Índice de referencia da evolución do mercado de consumo final de produtos lácteos no Estado Español
- Estrutura de custos das explotacións galegas
Con carácter anual elabórase un informe sobre o custo de produción nas explotacións lácteas, tomando como base os datos recollidos nun grupo de explotacións supervisadas polo programa de xestión. Este informe recolle diversos índices de carácter técnico e os resultados económicos da explotación distinguindo os diversos tipos de ingresos e de custos.
- Prezos percibidos polos produtores de leite galegos
O Observatorio publica regularmente información sobre tres tipos de prezos:- Os prezos percibidos polos produtores de leite en función do tamaño da explotación. A información ten carácter mensual e nela desagréganse os distintos compoñentes do prezo final (prezo base e distintas primas).
- Os prezos pagados polos produtores polos principais insumos utilizados na produción láctea. A información ten carácter mensual.
- Os prezos de venda ao público nas principais canles de comercialización de lácteos (leites, iogures e queixos) en Galicia. A información ten carácter mensual.
- O índice de referencia da evolución do mercado de consumo final de produtos lácteos no Estado Español
O índice sobre a evolución do mercado de produtos lácteos (EMPLA) defínese tendo en conta a procedencia dos produtos lácteos distribuídos para o consumo final no conxunto do Estado Español. No cálculo do EMPLA tense en conta a evolución de diversos parámetros:- A evolución dos prezos dos produtos lácteos elaborados no interior do Estado e destinados ao mesmo mercado interior.
- A evolución do prezo dos produtos frescos importados
- A evolución do prezo do queixo importado
O cálculo do EMPLA faise trimestralmente e o seu valor mide a variación ao respecto do mesmo trimestre do ano anterior.
Consulte o índice sobre a evolución do mercado (EMPLA)
