Doenzas e epizootias

Os programas de erradicación, loita e control de enfermidades animais permitiron diminuír a incidencia dalgunha destas enfermidades a uns límites que xa están próximos a valores de erradicación.

Contar cun elevado número de explotacións libres desas enfermidades é o punto de partida para formular outros programas sanitarios e, o que é máis importante, contar con animais sans permite aplicar programas de mellora produtiva a través dos que se optimicen os recursos naturais dispoñíbeis para a súa alimentación.

Programas que se están a desenvolver:

Erradicación, loita e control da tuberculose e da brucelose bovina.
Erradicación da brucelose ovina e cabrúa.
Vixilancia, control e erradicación das encefalopatías esponxiformes transmisíbeis (EETs).
Plan sanitario do sector porcino: o programa de control e erradicación da enfermidade de Aujeszky terá unha especial incidencia no sector, dado que a súa erradicación suporía unha notábel mellora nas condicións de produción e comercialización.
Plan sanitario avícola: plan de control e erradicación de salmoneloses aviares, plan de control da influenza aviar.
Programa de loita contra as enfermidades apícolas: enmarcado no Programa nacional de axudas á apicultura desenvolvido mediante un Real Decreto estatal en aplicación do previsto no correspondente regulamento comunitario que recolle as distintas liñas de axuda a este sector.
Programa de vixilancia e erradicación da Lingua Azul.
Programas sanitarios facultativos: impulso, adaptación normativa e consolidación das agrupacións de defensa sanitaria gandeira en Galicia (ADSG) co obxecto de acadar niveis sanitarios superiores aos esixidos polos programas obrigatorios.
Programa de control oficial de etiquetado da carne de vacún, que por medio de actuacións na fase de produción vai garantir o correcto funcionamento do sistema de información -rastrexabilidade- na cadea alimentaria.
Plans de control da aplicación da normativa de benestar dos animais.
Implementación da estrutura e medios necesarios nos Servizos Veterinarios Oficiais para afrontar situacións de alertas sanitarias.
Control da seguridade alimentaria das producións gandeiras mediante o mantemento dos programas actuais de alimentación animal, PNIR, medicamento veterinario, control de subprodutos de orixe animal, inspección da calidade do leite cru nas explotacións, e a aplicación da normativa europea de hixiene.
Estruturación dentro dos Servizos Veterinarios Oficiais dunha Rede de Epidemio-Vixilancia que poña en valor a información dos programas sanitarios en funcionamento e que reduza o tempo que os produtores adican a cumprimentación de rexistros e declaracións oficiais.
Adaptación das explotacións ás novas normas comunitarias de sanidade animal e de rastrexabilidade das producións (identificación de ovino e equino, entre outras).