Control e certificación de vide
Enténdese por control e certificación de plantas de viveiro de vide, todo o conxunto de tarefas da Administración encamiñadas ao control do proceso produtivo e venda de calquera tipo de material vexetal de reprodución de vide, proceso que deberá cumprir cos requisitos obrigatorios preceptuados nos Regulamentos correspondentes para asegurar a calidade destes produtos.
Para producir e comercializar planta de viveiro de vide precísase dunha autorización da Consellería do Medio Rural, que se outorga unha vez comprobado o cumprimento da normativa que establece, entre outras condicións, os mínimos de capacitación profesional e instalacións precisas para a multiplicación destas plantas en viveiro.
No momento no que un viveiro, persoa física ou xurídica, é autorizado a producir e vender este material vexetal, queda sometido ao control nas diferentes fases da produción, dende o establecemento dos campos de pés nais e as entradas de materiais vexetais doutros viveiros, ata as saídas dos materiais vexetais producidos no viveiro (portaenxertos, púas e xemas, plantas enxertadas, etc) destinados ao comercio cos viticultores ou se é o caso con outros viveiros.
Un produtor de plantas de viveiro de vide en posesión do título acreditativo de autorización da administración, pode precintar e etiquetar a planta de viveiro de vide de acordo cos Regulamentos de control e certificación e polo tanto baixo supervisión oficial.
No caso de que unha persoa física ou xurídica teña interese en obter, para a súa posterior multiplicación polas canles anteriormente referidas, unha nova variedade, debe solicitar previamente a inscrición no rexistro de variedades comerciais da nova variedade en cuestión e se quere protexer os dereitos de obtención procederá ademais á inscrición no rexistro de variedades protexidas.
Real Decreto 1891/2008, do 14 de novembro, polo que se aproba o Regulamento para a autorización e rexistro dos produtores de sementes e plantas de viveiro e a súa inclusión no Rexistro nacional de produtores (95 Kb).
Lei 30/2006 do 26 de xullo, de sementes e plantas de viveiro e de recursos fitoxenéticos (444 Kb).
Lei 3/2000 do 7 de xaneiro (BOE nº 8 do 10/01/2000) de réxime xurídico da protección das obtencións vexetais (85 Kb).
Real Decreto 208/2003 do 21 de febreiro (BOE nº 48 do 25/02/2003) polo que se aproba o Regulamento Técnico de Control e Certificación de Plantas de Viveiro de Vide (59 Kb).
Real Decreto 1244/2008, do 18 de xullo, polo que se regula o potencial de produción vitícola (898 Kb).
Orde APA/2474/2006, do 27 de xullo, pola que se modifican determinados anexos do Regulamento Técnico de Control e Certificación de plantas de viveiro de vide aprobado polo Real Decreto 208/2003, do 21 de febreiro (135 Kb).
- Solicitude do título de produtor autorizado. Rexistro de Produtores Obtentores, Seleccionadores e Multiplicadores de Plantas de Viveiro.
Deberase presentar unha memoria técnica descritiva do proceso produtivo, das instalacións, da capacitación do persoal, das superficies dispoñibles que serán identificadas catastralmente, do material vexetal a producir e do ámbito de mercado previsto, todo isto seguindo os preceptos establecidos na normativa xa referida.
Resumo dos requisitos para acadar o título de produtor de plantas de viveiro de vide (21 Kb)
Viveiros produtores-multiplicadores de plantas de viveiro de vide (14 Kb) - Certificación de plantas de viveiro de vide.
Poden certificar plantas de viveiro de vide aquelas persoas físicas ou xurídicas que estean autorizadas e inscritas no Rexistro de Produtores Obtentores, Seleccionadores e Multiplicadores de Plantas de Viveiro e cumpran co establecido no Real Decreto 208/2003, do 21 de febreiro polo que se aproba o Regulamento Técnico de Control e Certificación de Plantas de Viveiro de Vide (BOE nº 48 do 25/02/2003).
O material vexetal aparecerá no mercado coa correspondente etiqueta oficial acorde coa categoría da mesma. A categoría "certificada" identifícase cunha etiqueta cor azul e a categoría "estándar" cunha de cor marela, e nas dúas figuran os datos do produtor autorizado e do organismo responsable do control.
- Solicitude de rexistro dunha caste nova. Rexistro de variedades comerciais (catálogo común).
Presentaranse en formularios normalizados cun cuestionario técnico descritivo da variedade a rexistrar, acompañado da documentación preceptiva que incluirá toda aquela información necesaria para a identificación da caste (estudios e ensaios previos, se procede). A documentación irá acompañada dunha mostra suficiente de material vexetal da caste obxecto do trámite de inscrición. - Solicitude do título de obtención vexetal. Rexistro de castes protexidas.
Que unha caste vexetal estea protexida implica que existe un sistema de protección dos dereitos do obtentor entendido como a persoa que teña creado ou descuberto e desenvolvido a devandita caste. Para a protección dunha variedade débese proceder ó trámite de inscrición da caste no rexistro de castes protexidas cubrindo a documentación pertinente que se xuntará á solicitude normalizada e ao xustificante do pago das taxas oportunas.
4. Introdución no sistema de certificación 
A Consellería do Medio Rural e do Mar mediante o desenvolvemento do programa de selección clonal de videiras autóctonas de Galicia, traballa dende hai tempo na recuperación e selección das castes de vide que tradicionalmente se veñen cultivando nos viñedos galegos.
Os clons de vide seleccionados, de alta calidade sanitaria e varietal, teñen a súa vía máis axeitada de distribución ao sector vitivinícola a través do Sistema de certificación, pois é o único que garante e controla a conservación da devandita calidade. A recondución dos clons de vide seleccionados á canle de certificación só se realiza por medio da súa distribución entre o sector viveirista autorizado coa categoría de produtor-multiplicador de plantas de viveiro de vide.
O obxectivo último é facerlle chegar aos viticultores, polas canles de certificación oficial, o mellor material vexetal de vide con garantía de calidade sanitaria contrastada (castes de vide certificadas), para que poidan producir os mellores viños galegos destacando, mediante o emprego de variedades autóctonas, pola súa diferenciación e tipicidade.
Aquí (pdf, 245 Kb) pode consultar os pasos a seguir para a obtención do material vexetal seleccionado e a súa recondución ao sistema de certificación.
