Beneficiarios e investimentos obxecto da axuda
Beneficiarios
Os plans de mellora das explotacións agrarias suporán unha mellora integral e duradeira da economía da explotación agraria, e ademais deberán demostrar, mediante cálculos específicos, que os investimentos materiais ou inmateriais a executar están xustificados desde o punto de vista da situación da explotación e da súa economía e que a súa realización suporá unha mellora do rendemento global da explotación agrícola. Os beneficiarios, entre outros requisitos, deberán:
- Ser titulares dunha explotación agraria.
- Presentar un plan de mellora da súa explotación.
- Comprometerse a exercer a actividade agraria durante cinco anos.
- Acreditar a súa viabilidade económica.
- Acadar polo menos unha UTA.
- Cumprir as normas mínimas en materia de ambiente, hixiene e benestar dos animais.
Investimentos obxecto de axuda
- A mellora das condicións de vida e traballo dos/as agricultores/as.
- A mellora cualitativa das producións en función das necesidades de mercado e con vistas á adaptación ás normas comunitarias de calidade, así como para a diversificación das actividades agrarias.
- A adaptación das explotacións con vistas a reducir os custos de produción, aforrar enerxía ou auga, ou a incorporación de novas tecnoloxías.
- O cumprimento das novas normas comunitarias en materia de ambiente, hixiene e benestar dos animais.
- A mellora das condicións de hixiene das explotacións gandeiras, a protección e mellora do solo, da cuberta vexetal e do ambiente.
Investimentos exceptuados de axuda
Non se concederán axudas para os seguintes investimentos:
- Os investimentos de simple substitución non poderán optar a axudas ao investimento.
- Os investimentos na compra de dereitos de produción, animais e plantas anuais e a súa plantación.
