Carpa (Cyprinus carpio)

Especie de grandes dimensións que pode chegar ao metro de lonxitude e aos 30 kg de peso. Corpo robusto e lixeiramente curvado no ventre, está cuberto por escamas grosas. Unha característica deste tipo de peixes é a súa aleta dorsal e anal con espiña serrada na parte anterior; a súa coloración é verdosa oliva no dorso e ten o ventre branco-amarelado.

Reprodución

A época de cría empeza na primavera e remata a principios do verán. Prefiren para desovar augas pouco profundas cunha densa cuberta vexetal. Os ovos quedan fixados ao substrato ata que eclosionan. O tempo que tardan en eclosionar está relacionado coa temperatura da auga. Unha femia chega a depositar ata 300.000 ovos.

Alimentación

Son peixes omnívoros que consomen restos vexetais, insectos, crustáceos e alevíns de todo tipo de peixes; ademais, gústanlles moito os invertebrados bentónicos.

Hábitat

Prefire augas de curso lento ou estancadas, con fondos limosos e cunha temperatura morna ou cálida (14-35 ºC), sendo moi resistente á escaseza de oxíxeno e á contaminación das augas. Cando a temperatura da auga descende por debaixo dos 15 ºC, reduce a súa actividade, e por debaixo dos 10 ºC escóndese baixo o lama do fondo.

Distribución

Orixinaria de Asia Central e o leste de Europa, estendeuse de forma natural ou por introdución antropoxénica en países de todo o mundo. Na península Ibérica é actualmente moi abundante nos encoros, lagos e tramos medios e baixos dos ríos. Menos abundante no NO peninsular, aínda que en Galicia está presente en practicamente todos os encoros.