Hydrocharis morsus-ranae (Hydrocharis morsus-ranae)
Descrición
Planta herbácea acuática, con talos rastreiros, longos e delgados (estoloníferos), non enraizados que flotan preto da superficie. Follas flotantes ou ocasionalmente emerxentes, de forma orbicular con bordo enteiro e cordadas na base. As flores femininas solitarias son olorosas, con nectarios que atraen os insectos; as masculinas aparecen en grupos de 2-3, con pedicelo alongado. Pétalos brancos coa base amarela. O froito é unha baga.
Demografía
En función dos cálculos realizados, a especie presentaría unha densidade de 40 individuos/40 m2.
Hábitat
Vive en lagoas permanentes, con baixa mineralización e con fondos ricos en materia orgánica. As formacións flotantes fórmanse nas zonas de augas remansadas.
Distribución
A poboación da Terra Chá (Lugo) é unha das poucas existentes na península Ibérica. Está situada dentro dun territorio protexido: o LIC Ladra-Parga-Támoga.
Estado de conservación
En Galicia, nos últimos anos, encontrouse unha nova localidade. Observouse que se reduciron notablemente as poboacións da península Ibérica. A aparición de especies invasoras como o cangrexo vermello americano e o fieito (Azolla filiculoides), xunto con outros, son os principais factores que inflúen na supervivencia desta especie.
Categoría de conservación
En perigo de extinción.
Ficha (30 Kb)
