Renovación de maquinaria agrícola
A Consellería do Medio Rural e do Mar incentiva a renovación do parque de tractores e máquinas automotrices agrícolas mediante a substitución das máquinas máis vellas, que deberán ir destinadas ao desmantelamento, por novos tractores e novas máquinas que, ao estaren equipadas con modernas tecnoloxías, melloran as condicións de traballo, teñen unha maior eficiencia enerxética e producen menor impacto ambiental.
Os obxectivos que se pretenden acadar son:
- Garantir unha mellora nas condicións de traballo dos agricultores e das agricultoras no manexo da maquinaria agrícola.
- Incrementar o equipamento destes vehículos para maior seguridade nos seus desprazamentos polas vías públicas.
- Potenciar a utilización de tractores e máquinas automotrices dotados con motores de novo deseño e de mellor aproveitamento enerxético do combustible.
- Reducir a contaminación por emisión de gases e o seu nivel sonoro.
- Asegurar a introdución na agricultura de tractores e máquinas con alta tecnoloxía, fiables e apropiados para satisfacer os requirimentos demandados pola agricultura moderna.
- Promover a utilización en común da maquinaria agrícola para economizar os recursos do sector.
Medio Rural promove o uso de maquinaria e de equipamento agrario en réxime asociativo, co fin de minimizar os custos das explotacións, mellorar as condicións de traballo do seus titulares, incrementar os mecanismos de seguridade e as novas tecnoloxías no emprego de maquinaria e reducir as emisións contaminantes.
Os principais beneficiarios desta liña son aquelas CUMAS e SATS que teñan como obxecto social prioritario o uso de maquinaria ou que presten estes servizos.
A subvención cobre, como máximo, o 50% do investimento que se realice, que poderá consistir, entre outras cousas, na adquisición de maquinaria por primeira vez, na mellora tecnolóxica da mesma, na incorporación de sistemas mecánicos nas viñas ou na construción e adquisición de instalacións para o almacenamento de xurros ou forraxes.
Rexistro de maquinaria agrícola da Xunta de Galicia
